07 January 2009

على باب سفارة كندا


على باب سفارة كندا
لمحت ابليس و ف ايده استمارة
بقوله على فين قالي بص
يا هجرة يا اعارة
يا عم انا كفرت و زهقت
ألاقيش معاك سيجارة

أنا انتهيت خلاص
لا نافع وسواس و لا خناس
و لا ليا عيش وسط الناس
دول عالم مجرمين
عندكوا فائض ف الفساد
ف كل البلاد
و مش محتاجين شياطين

مليش عيش ف البلد دي
بقالي سنين عاطل
و انتوا بتعرفوا تقلبوا الحق باطل
و تسلكوا القاتل
و تمشوا ف جنازة المقتول
و مفيش مشاكل

يا عم ده انا بقيت اوسوس بالمقلوب
و اقول للحرامي كفاية بقى توب
انت لوحدك هتعمل كل الذنوب
و انا ابليس اشتغل واعظ
و لا كمساري ف اتوبيس

يا عم دا انا زمان كنت استنى حد ينسى يسمي
و هو بياكل لقمته
دلوقتي كل اكلكوا ملوث
و بصراحة الواحد خايف على صحته
ده مفيش ضمير اساسا
علشان اموته
كل واحد بمزاجه خربانة زمته
يا عم دا كل حاجة اتسرقت
و كده الاجيال الجديدة من الحرامية
اتظلمت

يا راجل دا من كتر ما لطشت معايا
خرجت ف مظاهرة مع الناس اللى بتقول كفاية
و برضه مفيش فايدة !!


===========
كتبها .. على سلامة

06 January 2009

طفي النيون


طفـّي النيون
دي رواية هادفة للجنون
نزل ستاير مسرحك
دا العرض كان ملهوش زبون

هد الديكور والإعلانات
شيل الكراسي م الصالات
بعد الحكاوى والكلام
أهو جه خلاص وقت السكات

شباك تذاكرك
إقفله
العرض فركش
بطلنا تاني نمثله
بطلنا نتلون ونرسم
فوق وشوشنا ألف وش
بطلنا نضحك وإحنا جوانا الألم
بطلنا غش

بطلنا نبقي البهلوان فوق الحبال
نحفظ ونحفظ في الكلام
إتقال كتير
وإتعاد كتير لسنين طوال

كام قلب غيري وقلب غيرك
مثلوا نفس الرواية
وأنا وإنت قاعدين في الصفوف
وبنبتسم اّخر الحكاية

ونقول "نهاية إتكررت .. ليه الملل؟
" عنهم أكيد راح نختلف "

تسمح لقلبك يعترف
من غير خجل
ليه إفتكرنا إننا فوق السيناريو والجُمل؟
ليه إفتكرنا إننا نقدر نكون
غير البشر.. فوق القدر .. فوق الفنون؟
حلم الخلود في العشق وصلنا الجنون

وأدينا برضه بننتهي نفس النهاية
ضاعت ملامح حلمنا
وبقينا نشبه للي وقفوا ع المسارح قبلنا
مش باقي من كل الصخب غير السكون
لاقدرت تصبح شكسبير
ولا حتي نفسي قدرت أكون
وعشان كدة _من غير خجل_ نزل ستاير مسرحك

وإطفي النيون

******
أشعار .. محمد الإمام