وبقولها
إتدلعي وإتبغددي
وإتفاخري وإتباهي
قولي لكل الناس ده عشقني والله
لمي العيال حواليا زفوني
ظاظوا عليا وحدفوني طوب
ما أنا اللي سبت عنيكي لفوني
وأنا اللي أستاهل كل يوم مركوب
فاتدلعي واتبغددي
وإتفاخري وإتباهي
آدي ضحية كمان فدا رمشك الساهي
موت الضحايا جزايا .. ما أنا اللي وديتك
ولحد حد ما ودتوش ولا حد .. وديتك
وقلعت كل سنيني على خصرك
ضفرت شعرك عش جوايا
بايعت حكمك وإبتديت عصرك
ووقفت ورا عرشك ومسكت هوايه
موت الضحايا جزايا وكلها ضحايا
مين اللي قال الحب آخره عمار؟؟
الحب آخره نهاية في رحاية
القسوة طاحنة والحجر دوار
فاتدلعي واتبغددي
وإتفاخري وإتباهي
وإستنركي من عزتي
وإستهتري بجاهي
خليني مضرب مثل من بعد هيبة و وزن
كبي المرار في العسل وإملي الفرح بالحزن
يعني إنتي أولهم ؟ ولا إنتي أول هم ؟
ولا إنتي أول سهم إتسن لي وإتسم ؟
لو تكشفي ضهري تلقي السهام علامات
وأنا زي زرع ف هوا وطى حيي وعلا مات
موت العلالي شرف بس إسمها موتة
مش عدل تبقي في ترف وأنا بطفح الكوتة
ما يا إما نقسمهم وخزة قصاد وخزة
يا إما لا مؤاخذة .. توتة يا حدوتة
وإبقي إكدبي براحتك .. وإتدلعي براحتك
طعم الهزيمة جزا للي يزور ساحتك
وأنا قلبي ياما غلب .. مش عيب يبات مغلوب
أهو برضه فدتينا وكفرنا بيكي ذنوب
ولحسنا من شهدك وشربنا من ريقك
وسكرنا من كاسك وكسرنا إبريقك
وطعمنا من حسنك وشبعنا ببريقك
ومشينا في طريقك
ورجعنا ملو اليد
جرحي قصاد جرحك .. ولا حد ظالم حد
ولا إنتي فاكرانا رجالة خيبانة ؟
نبكي على النسوان ونسح في بكانا ؟
كنتي إسألي " نانا "
اللي إسمها " نانا "
يدوب زعلنا يومين وأهي دنيا لاهيانا
هبكي عليكي إنتي !
ما تكدبيش ع الناس .. الناس دي عارفاني
قلبي خشب لو غطس بيقب من تاني
فمتحرجيش روحك وتقولي ده عشقني
بدل ما صحباتك يقولولك آدي دقني
حبي على قدك وإحكي على قدك
وإن جت سيرتنا ف يوم إبقى إلزمي حدك
تتدلعي ماشي .. تتبغددي ماشي
وتقولي حبني موت برضه ميجراشي
بس إنتي من جوة عارفة إن زمنك مات
وبقيتي زي أميرة قلبها شحات
لفي على صحابي .. سبيني في غيابي
قولي إن عمرك يوم ما وقفتي على بابي
لا كويتي قمصاني ولا جيتي زرتيني
ولا تعرفي مكاني ولا تعرفي تجيني
وإني يدوب واحد دايب في دباديبك
عامل كما عيل شابط في جلاليبك
وإنتي يا عيني أوف
زهقانة مني خلاص
عملتي زار بالدف
وسقتي كل الناس
وأنا بردو لازقلك
معلش حظك كده ربك ورازقلك
روحي يا شاطرة هناك إنضمي للألبوم
أنا كل عشرتي بيكي 22 يوم
عملتي نفسك حكاية
ومحبة فياضة ومخدة بكاية
وسهر وسهد وويل
وبكا وغنا ومواويل
في 22 ليل !!
على أي حال
شكراً وشكراً ثم شكراً للقصيدة
قلما تأتيني يا إمرأة بأفكار جديدة
-----------
كلمات الشاعر .. هشام الجخ
No comments:
Post a Comment