النهاردة جالها السكر .
ياااااااااااااااااااه عال الوجع اللي في قلبي .. يا ترى ها يحصل فيكي ايه يا بنتي ؟
يا ترى انتي ممكن تكوني متخيلة ايه اللي ممكن يحصل ؟
يا ترى ها تفهمي امك بتبكي ليه كل ما تشوفك و انتي في السرير و بتبتسم لك وسط دموعها ؟
يا ترى يا بنتي ايامك مخبيالك ايه ؟
يا ترى ها تحسسي ازاي و الكل بيبص لك ؟
يا ترى ها تفهمي معنى الورد و اللعب اللي الناس ها يغرقوكي بيها ؟
يا ترى ها تفهمي ايامك الطويلة في المستشفى بعيد عن اخواتك ؟
يا ترى اخواتك هايفهموا ليه بابا و ماما بيحبوكي اوي كده ؟
يا ترى ها تتعذبي بعذابهم عليكي و انتي لوحدك ؟
يا ترى ها تفهمي لما اخواتك يغيروا منك على الاهتمام الزيادة ؟
و لما يجرحوكي و يقولولك ابعدي عننا علشان انتي عيانة هاتبكي و انتي مش فاهمة ؟
بس برضة ها تحبيهم اوي
على قد وحدتك و بعدك عنهم في المستشفيات ها تحبيهم
يا ترى هاتتحرمي في يوم من الدراسة اللي نفسك فيها علشان انتي عيانة ؟
ولا هاتتحرمي من الهواية اللي بتحبيها علشان اهلك خايفيين على اي مجهود زيادة تعمليه ؟
يا ترى لما تتفوقي في دراستك مع انك قضيتي اسبوع قبل الامتحان في المستشفى .. هايفتكروا زميلاتك يقولولك سلامتك بدل من مبروك على الدرجة النهائية ؟
يا ترى في يوم من الايام ها تدخلي الحياة العملية و انتي مؤمنة تماما انك مش زي اي بنت ممكن تحب و تتحب و تتجوز و تخلف ؟
يا ترى ها تعيشي و انتي مؤمنة ان مالكيش غير شغلك و بس ؟
يا ترى يا بنتي لما الحب يدق قلبك ها يجي اللي يكسرك ؟
يا ترى لما تحبي من قلبك هايجي اللي يقولك ماما عايزة تاخدك للدكتور علشان تتأكد انك سليمة و السكر مأثرش عليكي ؟
و تبكي
يبقى نفسك تقوليله ايوة اثر و اثر جامد اوي
كفاية اني اتكسرت
و لما يتقدم لك العرسان و يمشوا واحد ورا التاني من برا برا
و تقولي و ايه يعني
اعيش و ايه يعني
و اللي تقبلي بيه على اللي فيه
لما يجي يوجعك يوجعك بمرضك
يا ترى هاتصدقي انك ناقصة ؟
يا ترى هاتنسي حلم الامومة تماماً و تبعدي عن اي حد يحاول يقرب منك لانك ما تنفعيش تكوني زوجة ؟
يا ترى ها تصدقي انك ما لكيش نصيب في الدنيا دي ؟
يا ترى في يوم من الايام هايبقى كل صحابك ممرضات و دكاترة و تكرهيهم لان دول هما اكتر ناس بتشوفيهم ؟
يا ترى هاتتعلمي تدفني آلمك و تكوني كده دمك خفيف و بتضحكي حتى مع آلمك
علشان الناس ما تزهقش منك ؟
يا ترى ها يبقى نفسك تصرخي و تقولي انا انسانة .. و مجروحة ؟
يا ترى يا بنتي ها تصدقي انك ما تعرفيش ؟ هاتصدقي انك ما تقدريش ؟
يا ترى ها تضحكي لدكتورك و انتي عيونك مليانة دموع و خوف و انتي بتقوليله
يعني ايه ؟ هو انا جسمي بيتحلل و لا ايه ؟ يا شيخ قول كلام غير دا
يا ترى مديرك في يوم من الايام هايقولك هو مش عارف يحتفظ بيكي على الرغم من انك انتي شاطرة اوي في شغلك و يوطي صوته زي ما يكون هايقول حاجة عيب و هو بيقول بس بتعيي كتير .
و تبتسمي ابتسامة عريضة توجع شفايفك و تقولي له زي ما حضرتك تشوف يا فندم مصلحة الشغل اهم و انا بروفيشنال و مش بزعل من الكلام ده .
يا ترى في يوم من الايام هاتلاقي نفسك بتعتذري لانك عندك السكر .
و لا النكتة لما كلمت مامتك النهاردة و سمعاها بتضحك لك في وسط صوت بكاها و تقوللي انتي صحتك عاملة ايه دلوقتي و اقولها انا كويسة جدا و ما تقلقيش دا السكر حاجة بسيطة اوي !!!!!!
يا رب يا بنتي تكوني قوية .. يا رب يا بنتي تكوني احسن و فرصك في الحياة احسن .. يا رب يا بنتي على زمنك الطب يتقدم اكتر و اكتر باذن الله .. يا رب يرزقك قلب شفاف و رقيق و يديكي قصاد صحتك روح ملايكة و قبول من عنده دايما يا رب .. يا رب يا بنتي تحسي بقيمة نفسك و ما تسمحيش لحد يجرحك .. يا رب تقدري تحبي الناس على ضعفهم .. و ان جرحوكي ربنا هايجبر بخاطرك بأذن الله .
ربنا يعينك يا بنتي .. ربنا يعينك .. مشوارك طويل .
.............................................................
منقول .. مدونة just me
No comments:
Post a Comment